L’associacion gorbarina "Sota Òrme" ven d’espelir

dimars 29 de genoier dal 2008

 

Arleta PASTOR, presidenta de "Sota Òrme"

presentacion a l’acampada generala de l’I.E.O. 06 a la Còla, lo 19 de genoier dau 2008

 

 

Bònjorn a totz,

Su aquina per representar a nòstr’associacion que se sòna : « Sota Òrme ». Volèm pas qu’a nòstra lenga gorbarina dispareisse.

Nos faria plaser de faire de rescòntres per un pauc discutar das países, de ço que podèm faire, dire per ensenhar a lenga.

Lo discors de la presidenta de « Sota Òrme », Arleta PASTOR

Perqué « Sota Òrme » ?

A l’entrada dau país, s’a plaça, i es un òrme qu’es vièlh, qu’a trei cents ans damé de bèlas pèiras au giro.

E sota òrme, i a d’ombra per totz...

Òrme es important perqué n’a vist passar de mondo, de generacions e generacions d’òmes que s’assetavan s’as pèiras, per esperar qu’as collègas arribessan das campanhas, da caça ; fasian un pichin arrèst avant d’anar manjar, blagavan, parlavan ensems.

Òrme es un luec de rescòntres...

Perqué « Sota Òrme » ?

N’a ja vist passar d’òmes, de fremas, de gorbas tot au giro que partian p’o marcat, d’enfants que jugavan, e de forestiers tanben : d’angleses qu’esperavan ai saumas per anar promenar... e totplen d’autres...

Esperem qu’a nòstr’associacion continue per nosautres e per ai nòstres enfants que vènon, que n’i sigue ren de perdut...

Esperem qu’es una pichina racina que creisse e madura...

E, se podèm, a farem fructifiar.

 

Arleta PASTOR, presidenta de "Sota Òrme"

Per escriure a l’associacion : sotaorme@laposte.net