Centre Cultural Occitan País Nissart e Alpenc

Associacion lei dal 1901, declaraa lo 1er de julh dal 1971 n° : 74 78

Tel : 04 93 80 07 12 / Port : 06 71 18 61 21 / Email : info@nissa.org

www.nissapantai.com Ràdio en òc

 

lo 21/09/2011

 

Al Govèrn d’Aran

Al Parlament de Catalonha

Al Tribunal constitucional

Al Govèrn a Madrid

 

 

Objeit : Sosten democràtic a la « LEI DER OCCITAN, ARANÉS EN ARAN » aprovat en Parlament de Catalonha lo 22.09.2010

Referença : acte polític dal Tribunal constitucional

 

Caras Dònas, Cars Sénhers,

 

Lo Govèrn central espanhòl a decidit de depausar al Tribunal Constitucional un recors per invalidar la Lei de l’occitan aranés aprovat en grand majoritat per lo Parlament de Catalonha lo 22 de setembre dal 2010. La nuòstra associacion protesta cuòntra l’acceptacion dal Tribunal de recéber aquesto recors que tèn a atacar e anular quatre articles de la Lei, tocants l’usatge preferencial de l’occitan-aranés e de l’obligacion de l’administracion d’Estat d’utilisar tantben l’occitan en Aran. Aquestos quatre articles son ja estats suspenduts per lo Tribunal.

 

Ambé la condamnacion de l’usatge preferencial de l’occitan en Aran, lo Conselh dals ministres va a l’encuòntra de la volontat de las institucions democràticas catalanas que si son prononçaas sus d’aquel tèxto. A quarquas setmanas de las eleccions, los partits tradicionals espanhòls (PSOE e PP) juègon la carta de l’electorat nacionalista castelhan e muòstron la siu vertadiera volontat de dominacion lenguística, coma se los 7.000 locutors de l’occitan en Aran posquésson amenaçar la lenga castelhana e l’estabilitat de l’Espanha.

 

Lo Centre Cultural Occitan País Nissart e Alpenc sosten completament los govèrns d’Aran e de Catalonha ancin que los ciutadans d’aquelos territòris que vuòlon lo respeit de la lenga dal siu territòri e n’en assegurar l’usatge normal en tots los domènis de la vita sociala. Aquestos dreches son garantits per la Declaracion Universala dals drechs lenguístics que los estats de l’Union Europèa si dèvon de respeitar. En asperant la vuòstra respuòsta, vos prego de recéber las nuòstras saludacions occitanas nissardas e alpencas,

 

Lo President, Laurenç REVEST